2005/02/14
Merkataritza Ganbarek urtean bi igandetan irekitzeko lortutako akordioa guztiz errefusatzen dugu

Bizkaiko eta Gipuzkoako Merkataritza Ganbarek urtean bi igandetan (uztailaren 3an eta abenduaren 4an) irekitzeko lortutako akordioak direla eta, honelako akordio partzialak guztiz errefusatzen ditugula adierazi nahi dugu. Are gehiago, gure ustetan Gasteizeko gobernuaren Dekretuari aurrea hartzea probokazio hutsa da.

Hemen inor ezin daiteke kontsentsu mahaiaz aritu, sindikatuek akordio horretan parte hartu ez dutenean. Sektoreko langileei lepoa eman zaie, eta azken finean, hauei eragiten die zuzenen neurri honek; euren lan baldintzak kaltetzen ditu eta bizitza kalitatea ere okerragotzen da.

Kontsumitzaileak ere ez dituzte gonbidatu; horrela, urtarrilaren 16ko manifestazioan parte hartu zuten milaka pertsonen ahotsa ez da mahai horretan ordezkatua izan.

Honek pentsarazten digu berriro ere, alde horrek bere interes ekonomikoak euskal jendarteak exijitzen dionaren aurrean jartzen dituela. Zorionez, Eroskik, kontsentsu Mahai horietan parte hartu arren, bi egun horietan ez irekitzea erabaki du, Elorrioko zentrotik igorritako barne ohar baten bidez jakinarazi duenez.

Hemen badago funtzionatu eta denok onartutako kontsentsua eta kontsentsu hori 0 da; edozein aldaketak, Gasteizeko gobernu zein Merkataritza Ganbarek erabakitakoa, aurretik egondako kontsentsua hautsi baino ez du egiten. Aurten birritan irekitzen badute, datorren urtean 4, 6 edo 8tan izan liteke; beraz ezin dugu aukera hori eman.

Hilaren 17an, osteguna, ordutegi komertzialen gaia eztabaidatuko da Legebiltzarrean, Sozialista Abertzaleak-ek aurkezturiko ez lege-proposamenaren bidez. Eta zentzu honetan ere, alderdi politikoei jarrera argia exijitu nahi diegu; euskal langileriaren alde dauden edo merkatal gune handien interes neoliberalak defendatuko dituzten.

Ez dugu atsedenerako eskubideari uko egingo, ezta sektorearen lan baldintzak gero eta prekarioagoak izatea onartu ere. Borrokatzen jarraituko dugu orain arte egin dugun bezala edo irmotasun handiagoz eta mobilizazioak berriro indartuko ditugu. Ildo horretatik merkataritza sektorean greba deitzeko aukera baloratzen ari gara.

Azkenik, Gasteizeko gobernuari gai hau birbideratzeko garaiz dagoela adierazi nahi diogu eta baita exijitu ere egin erantzukizunez jokatzeko, bestela aurrean izango gaitu eta.