2005/11/24
EAEko Administrazioko langileen 2006rako lan baldintzen Negoziazio Mahai Orokorrerako LABen planteamenduak eta 2005eko azaroaren 24ko bileraren ondorengo balorazioa

LABen pltaforma

2006ko lan-baldintzen negoziazioa urriaren 13an Mahaiak eginiko bileran ireki zen ofizialki. Bilera hartan, adostu bezala, LABek bere plataforma aurkeztu dio Administrazioari. Plataforma 13 puntutan biltzen diren eskakizunek osatzen dute. Hona hemen horietariko garrantzitsuenak:



1.- Erakundeen arteko Negoziazio Mahaia aktibatzea, administrazioan Negoziazio Kolektiboari bultzada berri bat ematearen alde, honako gai hauek eztabaidatzeko:
o Prekarietatea: azpikontratazioa, zerbitzu-enpresak eta plantilen garapena
o Langile guztien lan-baldintzen homogeneizazioa
o Euskal Administrazio publikoaren diseinu berri bat garatzea
o Lan Harremanen Euskal Esparruari lotutako negoziazio propioa, Madrilgo inposizioei lotu gabe.

2.- Akordioaren iraupena, urtebetekoa.

3.- Soldatak eguneratzea:
o KPI + 650 euro linealak, erosahalmena berreskuratzeko, batez ere soldata baxuenei dagokienez, beste Administrazio batzuetan egin duten bezala.
o Itzarri-BGAErako aportazioa izoztu eta aurreikusitako kopurua soldata-igoeran sartzea.

4.- Enplegua sortzeko neurriak:
o Plantilen egokipena
o Pribatizatutako zerbitzuetako lanpostuak Administrazioaren kudeaketa zuzenpean jartzea, alegia, publifikatzea





o Aldi-baterako kontratuak lanpostu finko bihurtzea
o Aparteko ordu ezabatu
o Ordezkapen eta errelebo kontratuaren formula langile guztiei hedatzea

5.- Euskalduntzea:
o Administrazioa benetan euskaldunduko duten planak
o Administrazioan lehenengo kontratua egiten duten langile guztiei euskaraz lan egiteko gaitasuna eskatzea eta gainontzeko langileak euskalduntzeko plangintza eraginkorra

6.- Lan osasuna:
o Prebentzio neurriak lantoki guztietan eta neurri horiek betetzen direla ziurtatzeko ikuskaritza
o Lan osasunarekin lotutako osasun prestazio guztiak sistema publikoaren menpe jartzea eta mutua pribatuen sistema alboratzea
o Arrisku psikosozialen ebaluazioa
o Lan-istripuei buruzko berariazko protokoloak

7.- Presoak:
o Lanpostua mantentzea preso dauden langileei
o Ordaindutako baimena presoak bisitatzeko


NEGOZIAZIOAREN BALORAZIOA

Aurtengo negoziazioa gainditu gabeko arazoekin hasi dugula gogoratu behar dugu. Alde batetik, Administrazioak bete gabe jarraitzen du 2000 urtean Mahai horretan enplegua sortzeko adostuta hartu zituen konpromisoak. Bestetik, aurreko urteetan egindako negoziazioetan gehiengo sindikalak eginiko planteamenduei muzin eginez, Administrazioak inposizio jarrera izan du.

2006ko negoziazioaren hasiera honetan, ez dugu aldaketarik sumatu Administrazioaren jarreran. Administrazioak Mahaian tratatu beharreko gaiak mugatu nahi ditu, negoziazioa soldaten igoerara mugatuz, beti ere igoera hori Madrilek KPIren azpitik jartzen duen 2,7ra mugatuz. Bestalde, Administrazioak ez du bere eskaintza inondik inora zehaztu, igoera lineala errefusatzeaz gain, igoeraren zenbatekoa akordioa lortzera baldintzatuz. Azkenik, gogoratu nahi dugu, azken bi urteetan, Udal eta Foru Administrazioan igoera linealak artikulatu direla.

Langileen ordezkaritzaren aldetik planteatutako gainontzeko gaiei buruz, Administrazioak ez du nahi ezta hitz egin ere.

Horrenbestez, Administrazioaren jarrerak Negoziazio aukerak aldez aurretik itxi egiten dituela ondoriozta dezakegu eta, bestalde, Mahai honen instrumentalizazio argi bat eragiten ari dela esan dezakegu, Mahaia bere interes eta lehentasun politikoen menpe jartzen jarraitzen duelako.

LABek benetako negoziazioa exijitzen dio Ibarretxeren Gobernuari, zerbitzu publikoak eta langileen lan baldintzak behar dituzten neurriak adostu eta indarrean jar daitezen lehenbailehen.