Aurrean duzun estilo-liburu honek eginkizun nagusi bat du: euskararen erabilera bultzatzea zeure eguneroko lanean. Liburua EUSLAB egitasmotik abiatuta landu dugu. Lanean euskara erabiltzeko, besteak beste, borondatea, planifikazioa eta erreminta lagungarriak behar zirela, eta halaxe sortua da, laguntzarako erreminta izateko asmotan.
Labur esanda, bi bidetatik iritsi nahi luke LABen euskarazek helburu nagusira:
1. Sindikatuan euskara sustatzeko sortzen diren egitasmoen berri-emaile izan nahi du. Horretarako prestatu dugu LAB eta euskara atala.
2. Euskaraz lan egiteko etortzen zaizkigun zalantza eta oztopoak gainditzen lagundu nahi dizu, batez ere idatzizko jardunekoak. Ondorengo atalak aurkituko dituzu:

• Euskaraz idazteko argibideak: hizkuntza-kontuak dira, gramatika-gai nagusiak eta lanean erabiltzen ditugun egitura arruntenak; baita maiz egin behar izaten ditugun testu formaletarako esaldi-ereduak ere.
• Euskaraz jarduteko dokumentuak: Sindikatuko barne- nahiz kanpo-funtzionamenduko dokumentuak bete eta erabiltzeko argibideak dira. Betiere, gehientsuen erabiltzen diren dokumentuak hautatu ditugu.
• Loturak: Interneten badira hizkuntzaren gorabeherak kontsultatzeko hainbat eta hainbat web-orri. Horietako batzuetara zuzenean sartzeko aukera duzu atal honetan.
• Euskara-gaztelania-frantsesa hiztegia: Sindikatuan eta bertako dokumentuetan bildutako lexikoa eta lokuzioak edo egitura bereziak dira; guztira, laneko jardunarekin zerikusia duten 6.700 sarrera.

Bukatzeko, azken atalean ekarpenak edo galderak egiteko aukera duzu, Ekarpenen txokoan, azken finean zeu baitzara lan hau hobetzen edo osatzen ongien lagun dezakezuna. Txoko honetara maiz etortzea, horixe da gure ametsa; lana euskaraz egiten duzunaren seinale izango baita hori.